14/1/06

AL AGÜELO EMIGRANTE EXTREMEÑO

Este soneto, con estrambote chamiciano, vié a icir argo asina como si Extremadura quisiera homenajeá a ese agüelo emigrante extremeño, a ese qu’entoavía le canta nanas a los sus nietos con castúas palabras, manque los nietos haigan nacío’n otras tierras, pa qu’enjamás s’orvíen de los sus raigones y d’aonde mamaron la su enjundia:

Extremadura al agüelo emigrante:

Fustigao po la jambre’n jarapales,
embebío de sol, con sus suores,
y con pardos adioses de dolores,
con tu ajogo m’echaste a tus costales.

Aonde juera que jueses d’andurriales,
con cachinos de mí, con mis jeores
de miajón escarbao con desamores,
alevantas mi vos entre pañales.

Y el eco d’esa vos jiere mu jondo
cuando naide escudriña d’aonde mana
acorde que s’ascucha tan reondo

en esa vos d’agüelo, en esa nana
qu’avienta tus pasaos aonde ajondo
castúas sementeras pa’l mañana.

Tú eres jierro y jumo,
y la jacha, y el jigo, y la jiguera;
y el palo qu’enarbola mi bandera.
Javier Feijóo


º