24/1/06

Siempre habrá campusinos



Manque ya no se jierren las yuntas
y ora sean de rueas las juellas,
siempre habrá campusinos
con su pardo coló d'experencia.

Manque ya no dé güertas la noria
pa qu'el agua atiborre l'alberca,
siempre habrá campusinos
con sus manos abriendo compuertas.

Manque'l filo encorvao del jocino
ya no siegue la espiga triguera,
siempre habrá campusinos
pa la siembra y pa la rastrojera.

Manque agora las vacas s'orvíen
de los deos qu'estrujaban sus tetas,
siempre habrá campusinos
al cuidiao del ganao en la jesa.

Manque'l mundo se güerva elertrino
porque agile p'alantre la cencia,
siempre habrá campusinos
trebajando y jurgando en la tierra.
Javier Feijóo
(Del mi libro: "oCURRencias")
.
º