La señá Carmen

Enlace p'ascuchá'l poema:  La señá Carmen

A ti,
¡Jembra de casta valiente!
¡Jembra de raza extremeña!
¡La señá Carmen, mi madre!
Mujé nacia en Olivenza
(la qu'antaño juera villa
de porfías portuguesas)
y emigrante'n Badajó
por los flecos de la guerra.

A ti,
qu'arrebañando'l perolo,
estrujando tu mollera,
destirajando los duros,
gaiteando tu caeza,
has arrempujao p'alantre
con caraite, con ralea,
con el genio y el coraje
de las jembras d'esta tierra,
ajorrando de la ná
p'ajuí de la probeza.

A ti,
las entrañas qu'alumbraron
tres varones y una jembra
con tu mesmo sortilejio;
de ti heredamos la juerza
pa no achantase ante naide
que quiá mojanos la oreja
y llevá mu arta la frente
sabiendo escondé las penas.

A ti,
que siendo mu chiquinino
me llevastes a la escuela
pa estudiá la jografía
y aprendé las cuatro reglas;
y endispués, con los ajorros
de tus juchas de pesetas,
dir a un colegio mu grande
con más números y letras.

A ti,
que gitaneabas precios
pa llená'l guarro de perras
y qu'enjamás me fartara
un bocao en la cartera;
y pa mercame gustosa
una güena bicicleta
pa dir contento y dichoso
más presto y listo a la escuela.

A ti,
¡Pan y condío en la cocina!
Dando güertas a esa cencia
veriguastes el secreto
de los guisos de l'agüela;
con tostás d'ajo y aceite
y sopas con yerbagüena;
con jilimoje y trincaya
y garbanzos y lentejas;
con migas y con torrijas
y con durzainas caseras
has jecho crecé este tallo
de raigambres extremeñas.

A ti,
por habeme acostumbrao
a dir siempre po las güenas,
a no incordi'á los mayores
con custiones endiscretas,
a defendé la familia,
l'amistá y las creencias
dispreciando los juitivos
camelos de la riqueza.

A ti,
que m'has jecho cavilá
que la jonra está en la juella
de los hombres que trebajan
con agallas y concencia;
de los machos que son machos
y respetan a las jembras;
mansos cuando tién que seglo
y fieros entre las fieras;
y tiernos en el regazo
de la mujé que les quiera.

A ti,
que prendiste'n tus adrentos
la llama de la querencia
d'un hombre güeno, mi padre,
y al caló d'esa juguera
brotó con genio y coraje
la rama de mi nacencia.
Pa mí, entre toas las madres,
la más grande'n esta tierra,
la que m'ha entregao su via
sin remilgos ni pereza.

A ti,
jorgorio de l'alegría
cuando me abres la puerta
y con un beso mu grande
me tisnas de primavera.
Lus de sol que se derrite
con la flama de mis venas
y se funde'n la saliva
que va templando mi lengua
pa lambiar tus cicatrices
y asín tenerte mu cerca,
antes qu'el tiempo arresople
en la llama de tu vela.

A ti,
¡MADRE!,
asina, con toa la juerza
de tu hijo chiquinino,
t'escribo yo este poema
p'agradecete'n el alma
la jonra de mi nacencia,
y jacer un homenaje
a las madres extremeñas,
qu'amamantan a sus hijos
como lo jacen las jembras,
arrempujando p'alantre,
ajuyendo e la probeza,
ajorrando y trebajando
con coraje y con concencia.

Javier Feijóo

(Del mi libro: "¡Asina! Sentimientos en Castúo")

.