Nueva opinión sobre la Güiquipeya y las Jablas Extremeñas

Diario Hoy, carta a director, 3 de mayo de 2008
Autor: Bienvenido Gutierro Rodríguez
Enlace: Los diez de la Güiquipeya
Otro enlace a otra Carta dirigida a El periódico Extremadura por el mismo autor el 17/03/08:
Enlace: A favor del Habla Extremeña. "La nacencia de una Asociación"

Bienvenío don Bienvenido (y diquelen bien los lectores d'este mi cuadernino que no es redundancia) a esta caraba de las jablas extremeñas (en la que la Asociación APLEX ya lleva bregando más e cuatro años), y animo a tos los que, como nusotros, cavilamos lo mesmo que usté y la bienvenía y recién nacía Asociación Cultural "Pablo Gonzálvez" (a quien dend'estas líneas l'endilgo un juerte abrazo), pa que broten muchas más asociaciones en este sentío y jagan corré correntones e tinta en tos los medios e comunicación , y asina, cuantiantes, jechen el freno a la "sentencia" injusta y a toas luces inmerecía qu'ice usté'n arrematando la su carta y asina jagamos que la vereína de las nuestras jablas no s'empete e la "maleza" (como icen los qu'entoavía jablan el portugués oliventino: la "magarza bellaca"), que quién jechá porcima d'ella los "detractores aduladores y pesebristas" que menta usté en la su carta, arrejundiéndola'n un joyo-sepultura bajo los terrones pardos y castúos de los nuestros campos y pueblos extremeños.

Porque, como icen argunas estrofinas del mi poema
"Ese orgulo d'extremeño" ,

"...¿Degde cuándo a los nacíos d’esta tierra
de poetas extremeños,
(mamantaos con la savia de su historia
y la juerza del azul de nuestro cielo,
que sabemos de fatigas y miserias
y habemos sufrío disprecio
de los guapos señoritos sabijondos
d’otros pueblos),
se nus ponen los mofletes coloraos
y amos a sentí argún mieo
d’escupí nuestros poemas
jasta onde quiera’l viento
esparcí con su soplío d’esperanza
lo poquino que sabemos?

¿Degde cuándo los qu’icen que son asina
(manque estén en el destierro
po la farta de trebajo
d’otros tiempos,
pero duermen toas las noches abrazaos
a los sueños extremeños),
s’acojonan cuando escriben como icen
sus más jondos sentimientos?..."

merece usté mi más juerte abrazo y mi más sincera enhoragüena por esas letrinas qu'ha endilgao'n el HOY, que a nusotros, a los qu'entoavía se nus jincha'l pecho d'ergullo ca ves qu'ascuchamos palrá a los extremeños que se sienten ergullosos de selo y de palralo, nus arrempuja pa seguí agilando p'alantre, pese a quien pese, con el inquebrantable téntigo que s'arraiga'n la nuestra identiá y con el merecío reconocimiento a tos los que, con la juerza y la ternura de los nuestros galraeros discurrieron en los nuestros pueblos, y entoavía lo jacen en muchos d'ellos.

Y es asína que no pueo por menos que golvé a endilgá'n esta mi libretina, ese poema que ya endilgué jace argún tiempino, pa dedicáselo a usté, a tos los socios de la su asociación y a tos los emigrantes extremeños que valoran dende ajuera ese patrimonio lingüístico que esos que tién la obligación de jacerlo no son escapaces e valorá, manque asina lo haigan arrecogío'n las nuestras propias Leyes Extremeñas aprobás por ellos mesmos.

"Güerfanos de verbos"

¡Agilen p’alantre los que tién curtura!
¡Agilen p’alantre los que tién talento!
¡Qu’agilen delantre tós los qu’han leío
porque yo no pueo!
Na más soy poeta,de los de nacencia,
de los extremeños,
y afilo mi pluma con la mi experencia,
y arrebusco, y jimplo, y escarbo’n los verbos.

¡Yo diré detrás con el mi magín
jilvanando versos!

Y es que yo cavilo:Pa tirá del carro
d’este galraero
a mí me s’ocurre que los ilustraos
tién que dir primeros.
Y aluego nusotros,
con versinos nuevos,
manque’n jarapales nus jagamos trizas
nuestros sentimientos,
pasino a pasino
jaremos sendero.

Y arrebuscaremos aquellas vereas
arrescondiínas por los nuestros pueblos;
castúas palabras, aquellas qu’antaño
icían los agüelos;
recaínos nuestros, los mesmos qu’hogaño
s’enrëan con el tiempo;
y güenos poemas, versos qu’en la tierra jueron enraigaos
por jondos pensares de grandes maestros.
¡Versos qu’entoavía
nus calan mu adrento!

Porqu’Extremadura es tierra arrogante
qu’esparramó cielo
por los escondrijos más arrebuscaos
d’este firmamento;
y los que jacemos memoria
d’aquello,con la savia nueva de los nuevos versos,
a viejos poetas
jonramos sin mieo.

¡Agilen p’alantre los que tién curtura
y nus abran paso a los poetas nuevos!
Pa que asín s’empolle
nnietos y bisnietos
de la nuestra galra...
...¡qu’entoavía hay tiempo!
Y palren asina,
y sin miëo manejen tós los nuestros verbos,
esos que nus jinchan el pecho d’ergullo
a los extremeños.

¡Qu’agilen p’alantre, qu’agilen con ganas
los que tién talento,
los que tién curtura,
los nobles, los güenos, los sabios maestros!
¡Naide s’acagace!
¡Naide tenga mieo!
Qu’asín arrejunde dende su nacencia
la juerza d’un pueblo
que labró los mares más arrebataos
y sembró caraite’n la tierra adrento
regao con sangre,
suores y esjuerzos.

Y asina emigraron nuestros campusinos,
nuestros labraores, los nuestros ancestros.
Y asina soñaron gorvel ergullosos
con una mijina de gloria y dinero.
¡Pero jueron tantos los que se quearon
durmios en el tiempo!
Su lágrima seca
dio retoños nuevos,
y endispués
los nietos
y endispués...
silencio.

Y quiciás por eso hoy endilgo un chillo
con töas las mis juerzas a ese nuestro cielo,
al desparramao por los escondrijos más arrebuscaos
d’este firmamento:
¡Gorvel emigrantes!
¡Gorvel extremeños!
¡Gorvel cuantiantes manque na más sea
pa la fiesta’l pueblo!
¡Gorvel con la galra qu’arrebujaína’n aquellos jatos
sus llevastis lejos!
¡Gorvel a la tierra d’aonde sus llevastisl
a vos qu’andenantes l’ascuché al agüelo!

Gorvel emigrantes!
¡Gorvel cuantiantes pa danos aliento!

¿No veis que nusotros, los qu’aquí queamos,
los que reguñimos con nusotros mesmos
sin tirá con juerza del carro eschangao
d’este galraero,
dende que sus juistis pa esos andurriales,
pa esos otros pueblos,
semos unos probes
güérfanos de verbos?

JAVIER FEIJÓO
fjavierfeijoo@hotmail.com
.