26/8/08

Soneto en Soledá (¡Asina!)

El miajón de mi fosca soledá
s’ha empapao de la juerza de mi canto
lambiendo’l lagrimón que arranca’l llanto
y estrujando mis versos sin piedá.

P’al río de las letras sin edá
m’arrempuja la magia de su encanto
y bebo en el torrente de su manto
sin rebujo qu’esconda salvedá.

Asín brotan los versos de mi alma,
en la orilla d’ese río qu’ajuye
al mar del pantaruja y la bisalma.

¡Asina! Este sentimiento fluye
p’ajuntase con la miel de la palma
aonde mi corazón amor diluye.

Javier Feijóo(Del libro: "¡Asina! Sentimientos en castúo")
Enlace p'ascuchá'l poema: ¡Asina!
.
º