Pa’l rasero de medí hay una tabla

Soneto con dedicatoria mu especial pa tos los nuestros emigrantes en tierras catalanas, que s’arrebujan ca sábado po la mañana alreó de “El rincón extremeño” , de Radio Unión Cataluña:

Le jicieron cavilá qu’España es Una,
Grande y Libre como reza’n su bandera
(manque aluego to ha queao’n una quimera
aonde ca y cual suerbe teta pa su cuna).

Y arruchao, con ladríos a la luna,
s’espetó con desazón d’aquí p’ajuera,
y su juerza dio la juerz’a otra frontera
pa que asina s’esmochara su jambruna.

Con trebajo y con el téntigo que afana
una miaja de moneas bien sonantes,
pa gorvé asina’l terruño cuantienantes,
s’empapó con sangre letra catalana;
y ora quié gorvé a palrá como andenantes
y esa España s’ha empetao d’intolerantes.

¿Aónde’l verbo tié más juerza que’l trebajo?
¿Aónde’l el hombre es menos hombre por su jabla?
Pa’l rasero de medí hay una tabla
sin movese ni p’arriba ni p’abajo.

Javier Feijóo