Si juéramos escapaces

Si jueramos escapaces d’echale való, argún qu’otro gallo mos cantaría. Y es que paece mentira que no seamos escapaces e danos ni una mijina e cuenta e lo qu’está pasando’n este nuestro ‘país e países’, aonde jasta las señales e tráfico ya no icen los mesmo d’un lao pa otro, por mo d’argunas ‘leyes e normalización lingüística’.

¡Ay... si Extremadura jiciera lo mesmo que jacen otros, si jiciera un recuentino e toas las palabras que poquino a poquino se nus han dío queando’n los campos, en los nuestros pueblos, en la vos (recia y curtía) e los nuestros agüelos; po la nuestra pereza, po la nuestra torpeza, po la nuestra vergüenza d’icirlas a voces pa que las ascuchen dende ajuera, pa que nus respeten y pa que naide, enjamás, güerva a s’escapás e icirnos que semos una recua e catetos...!

¡... Muchos más catetos he diquelao y ascuchao’n otros lugares palrando finino y sin na de való’n la su joía mollera!

Pero, quiciás, toa la curpa la tién tos aquellos qu’andenantes, al dir a l’ascuela, nus jacían leé finolis y mos castigaban na más se nus trasconejara’n el nuestro galraero arguno de los nuestros palabros, pa, endispués, sentise ergulloso del granino d’arena qu’habían sío escapaces d’aportá a la ‘topoderosa’ colonización lingüística de la nuestra tierra.

¿Y jasta cuándo habemos d’esperá pa endirgale a la nuestra lengua la valía que tié? ¿Pa cuándo nusotros, los extremeños, amos a sé escapaces de fijá’l día pa que se jaga oficiá’n la nuestra tierra la jorma e palrá e los nuestros antepasaos... y de los qu’entoavía palran asina’n los nuestros pueblos, iciendo: jumo, y la jacha, y el jigo y la jiguera; con la mesma juerza qu’arremeten los jierros e las jerramientas con las que arrebuscamos alevantá y dignificá la nuestra “Marca”?

Y asina arremato esta primera entrega d’este mi cuaderno, iciendo lo mesmo que ije dende’l prencipio:

¡Extremadura!

No rejuyas de la vos de tus ancestros.

Porque d’ella nus sentimos mu ergullosos

los que palramos asina, porque semos extremeños.

Javier Feijóo