A Julián Mojedano Muñiz

"LA VOZ DE EXTREMADURA" tié nombre y apellíos. Y yo, a esa vos, no pueo por menos que, emprencipiando este "blog", gorvel a rendile el justo homenaje que merece mi güen amigo, y entoavía mejó presona, Julián.

"Esa vos"

Arrebusco’n el jondón de mis sentíos
esa juerza qu’arrejunte mis palabras
pa jacer el homenaje que merece
a esa vos que del castúo jizo patria.

Y lo mesmo qu’el riachuelo cantarino
retozando entre los brezos y las jaras,
argo asín como la lus d’atardeceres
tiñendo las encinas de naranja,
asín brotan de mi pluma sentimientos
amasaos con el miajón d’estas palabras:

A esa vos engalaná d’Extremadura
mamantá con el coraje d’una raza,
qu’a los versos del maestro del castúo
dio la juerza qu’arrancara nuestras lágrimas.

A esa vos qu’estremeciera’n su quejío
a las recias jerramientas de labranza
cuando ajondan gorteando los terruños
escarbando d’esta tierra sus entrañas.

A esa vos de sonrisinas y de llanto,
a esa vos que tós llevamos drento’l alma,
a esa vos que tié tu nombre, MOJEDANO,
a esa vos que me s’antoja coló parda.

Javier Feijóo
.