JACER REGION

Hay quien cavila que jacer región tié mucho que vé con amamantá regionalismos trasnochaos. Y pué sé que no ande mu desencaminao. Pero, pa mí, na tié de malo sé regionalista, siempre que se otée y se valore con to'l respeto merecío lo d'ajuera, como tié que sé, y como sabemos jacerlo mu bien los extremeños, y enjamás diquelándose na más qu'el ombligo y dispreciando los ayeres ajenos (como vién jaciendo en otras partes).
Pero pa jacer región, una región juerte qu'alevante la caeza y agile p'alantre ergullosa sin que a naide se l'ocurra mojale la oreja, hay que prencipiá arremetiendo juncia a los sus cimientos, a los sus raigones, pa endiñarle toa nuestra juerza a ese patrimonio que jace de peana al nuestro ergullo extremeño.
Y ya semos un güen puñao de los de nacencia extremeña los que, dende jace mucho tiempo, andamos mu convencíos de qu'en ese patrimonio se tién que tené mu en cuenta y mu bien arrecogíos y divulgaos los variaos galraeros que parlamos aquí, como bien ice el artículo 60 de la Ley 2/1999, de 29 de marzo, de Patrimonio Histórico y Cultural d'Extremadura.
Asín que jagamos región, pero prencipiemos por aonde hay que prencipiá y endispués abramos la puerta'l mundo sin mieo ni vergüenza nenguna.

Javier Feijóo
Publicado en Diario HOY (Opinión, Mayo de 2004)
.