To está de más

Arrebusca la gente gorvé p’atrás.
Arrebusca’l prencipio, las sus raices.
Güerven a los conejos y a las perdices
y al guarro y las bellotas desperdigás.

Hay jumo’n las ciudades, jieden a gas,
no saben a lo mesmo las codornices;
igo que to ha cambiao. Me icen: ¿qué ices?
Igo qu’hay jartá e gentes embolicás.

Icen que semos pardos en estas tierras.
Icen qu’el aire limpio jiede a costumbre.
Icen tamién que semos de pocas perras.

Pero a mí me s’antoja que’l fuego es lumbre,
que’l agua mana limpia dende las sierras,
y que pa na m’importa’l jeó a jerrumbre.

Y arrebusca la gente gorvé p’atrás;
y arrebusca’l prencipio, las sus raices;
y siempre me s’antoja: ¡To está de más!

Javier Feijóo